قصة تجمع كثير من مفردات اللهجة القصيمية قبل خمسون سنة

بسم الله الرحمن الرحيم

kIbrahim6@

 

هذه قصة جمعت عدد كبير من مفردات  لهجة من أهل القصيم قبل خمسة عقود من الزمن استطعت أن أجمع بعض معاني مفرداتها من أحد كبار السن من بريده  دوّنتها تحت القصة

 ولا أطيل عليكم وإليكم القصة : 

{ من الأخت رقية إلى حضرة جناب الأخت لطيفة ورجله إسليّم حفظهم الله آمين أما بعد السلام عليكم ورحمة الله وبركاته بشرينا وشلونكم وإن سألتم عنا فحنا بخير ولا ينقصنا إلا شوفتكم و إسليم و زقرته الدحمي والحميدي وعبود وبرهوم عساهم متوجهين ونجاحهم قريب وان سألتم عنا والحمولة فحنا بخير و مرغدين و نبشركم البقرة أضنت وعليكم عندنا تذوقون

لباته ، وجابت ثور عقب احواره الأول ولا ندري وين الصميل لقينا القنارة ولا لقيناوه ودجاجتك الربشا راجنة وحطينا تحتهَ بيضه وبيض دجاجة منيرة الدخنا واروح اعسه كل بين عشاوين وأمي تويق عليه من صاير الباب المراح هي والرضاعين كل صبح تحتريه تفرخ ، وحنا نتناكم تجون علشان ننزل من البيت ، و تراوه  عقبك تهدم ، و الروشن صارت تخر

و الطاية تبيت نعيل و اشرفه جدعهنه السيل و الفاتولة  لحاه السيل و المصباح و المنفوح ما ينقعدبهن  و المثاعب تشرمت و الدرجة متراوله منحفر وسطه و تحتيّ الدرجة انتلت شمارخ من عقب القربه لدغته و القبة متحفرة و مليانه ريغا و باب السوق انقلعت مطقته و غزينا به  مراسن و سويق الباب ما نعلوه و جدرانه إلى الأن إعروق ما شبعت و المجبب طاحت سواكفه و القهوة مظلمة من السنا و فرجة تقطعت حبالهن ولا ينفتحت و مصاريعه تخلخلت  و مجاريهن طاحت  و باب الليوان يبي دّوّاسة ولاله كوّه و باب صفة الأرزاق طاحت سكرته و رجله منشلقه ، متثلّع  ازين مابالقهوة الروازن اللي به سرج الودك والفنز ، وترانا كزينا لكم مطبقية بزار ، وعِكّة سمن ، و شوي قريض ودقوقة للبزران ، وكليجا و فتيت ، ومحدرة به عذيق برحي ، و مطحن به شماريخ حتات روثانة بعضه مرمّخ ، وقّفّة  عبيط ، وقلة تمر من اللي بالجصة ، و يبيس تراوه مبقوش و معه حبحر من اللي جنب الحابوط بحايط خالك ، و بغينا نرسلك ذواقة تين من إشريعة أهلنا مير لقيناه مسّرّيّ و السكري يوم شفناه مسوّس فرغناوه من الزبلان و حطيناوه بالمنثر ويبسناوه بالشمس ، ويَخيّتي عند بسعة كزي لنا خطوط وبلي ريق أمك بعلومكم تراه تقطر كبده على سواليفكم اللي تقل سباحين ، وترا أمي شارهتن عليكم وعند الله سعة كيف مقصرين علي حتى بكز الخطوط ، وبعد ترا أمي إلى ذالحين يصكه راسه ‘لى جا طاريكم وفّطّنّاه لسالفة كشتكم بالبرقان المتقشعة و الفناجيل المتثلمة و قراشيعكم  اللي أنتِ خابره يوم يطبون عليكم المحمد وأثر ما معكم شي غير البقل اللي تقل روس مطانين و الكليجا اللي تقل عظامه ، وخليتوهم يباتون القوا على لحم بطنهم وأنتم تعرفون أنهم أهل سنع ونقاده وحقن  ولا يجوزلهم كل شي ، مير أشوا إنهم دريو إنكم تبون تطرشون و إلا كان علوم .

أبي اعلمك عن خالتي ميثا رحت لمه أمس لقيته لابخة بصلة على إصيبعه مّدّوحّسّ وطالع بابطه ( درو ) ، مير ترا قطوف راسه طابت الحمد لله تقول غسلته بربته وتمرة هند تقول إن جذعانه غاثينه وشابين كبده ماغير يسنون على ويبلعون هالتنيز لين صارو مداعيل ، إبراهيم مسقط ودوه لشما ترفعه ، وصويلح عالته حزات وعقب يوم إتخطرف له المهفة ويطيح على النقيرة  جاوه فلقة ثانية زالق بحبس صفة الحطب وعينه مجمحه ودلا يعرك وقبت ولزقو على الجفن تبنه على كل ذا من اللعبة بالريغا ، وفطم خزموه وعيت يخرقون خشمه للزمام ودخلت عند المقريه إتحفظه عمَ والعبدي حسنوه للمدرسة ، والأبو كاهوب إصحيح باع مخزن المداد وصابته حكة وتكبا بهدب أثل ولا فاد  ، وترك المسوح بالحسو عقب ما خرب بلبول قرو الكثان ويبس اللزا عقب ما إمزر إرشا الدلو ودلا يطق عفور ماينطح الماء وتقطر كبده عايش على ما القربه إهجدوه عقب ماهوب شاور  امي الساعة ، وأم الحميدي أخذت مِقطع الزري ورقعته ومخطم الترتر خبنته وثوب الروز صبغته ، وعباة الجدة خبيناه وصارت قد نويره  علشانه كبرت صارت تطول الوتد وتحفرت وحليله بالحيل تبل الكبد صايرة تقل بيرق بالبيت من عقب هفه على أبوه منول يوم هي إحصد هوا غمر ماش دلت تنصب مراسي القدر بالموقد ، واتجدع بمعي مطازيز ، وتكنس الوجار ، وتفرغ بيت رماده ، وتجمع خثي البقرة وتجلّه بالشمس وتظف الجلة وتفرغ رماد التنور وتنشر فرش العيال وتقصعهم بالشمس ولايعصد  ويمرس إلاهي وتحنحن وتعلق القفر وتتنز تمي وسفت مصللى خصاف وتلبس كشتبانه وتخيط بيوز وتصقل الزري وتنطا مداسيس وبادية تطق كوراره وتجلي الدلال وصندوق الهند وقمورة السحارة وتغير فتايل السرج وتسوف سنا قزازهن وتنفخ الدافور وتعبي الكوله قاز وتعشى مره بصحفته ومره بموقعك تقول إني احبه .

ولاودي أطول عليك عسى مايكف شوفتنا ولايقطع حروتنا ولاجناينا ولايعقبنا الا الصحة والعافية ودرارينا وانتم سالمين ختام . }

بعض المعاني التي لا تُفهم سجلتها من أحد كبار السن كبار السن من بريده

الكلمة	المعنى
جناب	قابلتك
لباته	أول حلبة من البقرة عند الولاده
عشاوين	بين المغرب والعشاء
تنعيل	تغطية الثقوب بالطين (تلييس )
المثاعب	مجرى الماء
مطقّته	الحلقة التي تُظرب بها الباب
المجبب	السقف
تخلخلت	تفكك أخشاب النافذة
سكرته	مزلاج
الفنز	سراج
عذيق	نص شمراخ
مبقوش	تمر بدون عجو مضغوط
مسّري	يوجد بداخله دودة
تطرشون	تسافرون
مسقط	لوز
المقريه	المدّرِسة
يطق عفور	يتيّمّمّ
الوتد	شماعه
تقصع	تخرج القمل
زقرته	أصدقائه
احواره	ولد البقرة
صاير	فتحة الباب بسيطة
القاتوله	فتحه بالسطح على الشارع
تشرمت	خَرِبت
غزينابه	ربطنا بِهِ حبل
القهوة	المجلس
مجاريهن	قفل النافذة
وجله	الخشبة التي تمسك مفصل الباب
عكه	قرية
مرّمّخ	لين صالح للأكل
حابوط	تقاطع بين ساقي وساقي
خطوط	رسائل
لابخه	إدخال البصل على الإصبع
النقيره	نجر من حجر
محسو	الدلو
مقّطّعْ	ثوب
بيرق	علم
خصاف	خوص
مرغدين	شبعانين
الصميل	خضاضة اللبن
المراح	الحوش أو فناء المنزل
لحاه	هدم
متراوله	هدمها السيل
مراسن	سلسة
الفرجة	النافذة
الدّوّاسه	مفصل الباب
متثلع	متهدم
الدقوقه	جراد مرقوق
قفه	ليف على شكل عشة
حايط	مزرعة
المتثلمة	متحفرة
درو	ورم في الإبط
حبس	حاجز عند الباب
الحسو	البئر
الزري	خيوط لونها ذهبي الذي على البشوت
دلت	بدأت
قموره	قمر:دبابيس على المدخنة
مرغدين	شبعانين
الصميل	خضاضة اللبن
المراح	الحوش أو فناء المنزل
لحاه	هدم
متراوله	هدمها السيل
مراسن	سلسة
الفرجة	النافذة
الدّوّاسه	مفصل الباب
متثلع	متهدم
الدقوقه	جراد مرقوق
قفه	ليف على شكل عشة
حايط	مزرعة
المتثلمة	متحفرة
درو	ورم في الإبط
حبس	حاجز عند الباب
الحسو	البئر
الزري	خيوط لونها ذهبي الذي على البشوت
دلت	بدأت
قموره	قمر:دبابيس على المدخنة

وهذه صورة القصة كما وصلتني

 .